Ayyukan Manzanni 25

¹ To, bayan kwana uku da Festus ya iso domin yă kama aikin gwamna, sai ya tashi daga Kaisariya ya tafi Urushalima.

² Sai manyan firistoci da shugabannin Yahudawa suka kai ƙarar Bulus a wurinsa. Suka roƙe shi,

³ yă sa a mai da Bulus Urushalima domin sun shirya waɗansu su jira su kashe shi a hanya.

⁴ Festus ya amsa ya ce, “Ana gadin Bulus a Kaisariya, ni da kaina zan je can ba da jimawa ba.

⁵ Saboda haka sai manyanku su zo tare da ni, idan kuwa mutumin nan yana da wani laifi sai su kawo ƙararsa.”

⁶ Bai fi kwana takwas ko goma a wurinsu ba, sai ya koma Kaisariya. Washegari kuma ya zauna a kujerar shariˈa, ya sa a kawo Bulus a gabansa.

⁷ Da Bulus ya zo, Yahudawan da suka zo daga Urushalima suka tashi suka kewaye shi, suna ta kawo ƙara masu yawa, masu tsanani a kansa, waɗanda ma ba su iya tabbatarwa ba.

⁸ Amma Bulus ya kāre kansa ya ce, “Ni ban yi wa Koyarwar Yahudawa laifi ba, ban kuma yi wa Haikali, ko Kaisar laifi ba ko kaɗan.”

⁹ Amma Festus yana so ya faranta wa Yahudawa rai, ya tambayi Bulus, “Ko ka yarda ka je Urushalima a yi maka shariˈa a gabana a can game da waɗannan abubuwa?”

¹⁰ Amma Bulus ya ce, “Ina gaban kotun Kaisar, a nan ne ya kamata a yi mini shariˈa. Ban yi wa Yahudawa wani laifi ba, kai ma ka san da haka sosai.

¹¹ Idan ni mai laifi ne, har na yi laifin da ya isa a kashe ni, ai, ba zan ƙi a kashe ni ba. Amma idan ba wata gaskiya a cikin ƙarar da suke yi, to, ba mai iya ba da ni gare su. Na roƙa a ɗaukaka ƙarata zuwa gaban Kaisar.”

¹² Bayan da Festus ya yi shawara da majalisarsa, sai ya amsa ya ce, “To, ka roƙa a ɗaukaka ƙararka zuwa gaban Kaisar, wurin Kaisar kuwa za ka tafi.”

¹³ Bayan ˈyan kwanaki, Sarki Agiriffa da Banis suka zo Kaisariya domin su marabci Festus.

¹⁴ Tun da za su yi kwanaki da dama a wurin, sai Festus ya kawo maganar Bulus ga sarki. Festus ya ce, “Akwai wani mutumin da Felis ya bar mini a kurkuku.

¹⁵ Lokacin da nake Urushalima manyan firistoci da shugabannin Yahudawa suka kawo mini ƙarar mutumin nan, suka roƙe ni in yanke masa hukunci.

¹⁶ Amma na gaya musu cewa mu Romawa ba mu saba yi wa mai laifi shariˈa ba, sai an kawo shi a gaban masu ƙararsa fuska da fuska, sai an kuma ba shi zarafi domin yă kāre kansa game da ƙarar da aka yi.

¹⁷ Saboda haka da suka zo nan tare da ni, ban ɓata lokaci ba, washegari kawai na hau kujerar shariˈa, na kuma sa a kawo mutumin.

¹⁸ Da masu ƙarar suka tashi, ba su kawo ƙararsa a kan wani mummunan laifin da nake tsammani ya yi ba.

¹⁹ Sai dai suna da waɗansu maganganun da ba su yarda da Bulus a kai ba, game da addininsu, da wani Yesu wanda ya mutu, wanda Bulus ya nace cewa yana da rai.

²⁰ Ni kuwa da na rasa yadda zan bincike waɗannan abubuwa, sai na tambayi Bulus ko ya yarda yă je Urushalima a yi masa shariˈa a can game da abubuwan nan.

²¹ Amma da ya nema a tsayar da maganarsa domin babban Sarki Kaisar yă yanke masa shariˈa, sai na ba da umarni a yi gadinsa har zuwa lokacin da zan aika da shi wurin Kaisar.”

²² Sai Sarki Agiriffa ya ce wa Festus, “Ni ma dai zan so in saurari mutumin nan da kaina.” Festus ya ce, “Za ka kuwa ji shi gobe.”

²³ To, washegari sai Agiriffa da Banis suka shigo da daraja irin ta sarakuna, sun zo tare da shugabannin yaƙi da kuma manyan garin. Sai Festus ya ba da umarni a shigo da Bulus.

²⁴ Sai Festus ya ce, “Sarki Agiriffa, da dukan mutanen da suke nan tare da mu, ga mutumin da duk jamaˈar Yahudawa suka kawo mini ƙararsa a Urushalima, da kuma a nan, har suna ihu wai bai kamata a bar shi da rai ba.

²⁵ Amma ni ban ga ya yi wani abin da ya isa a kashe shi ba. Tun da kuma shi da kansa ya nema a kai shariˈarsa gaban mai girma Kaisar, na ce to zan aika da shi wurinsa.

²⁶ Amma ba ni da wata tabbatacciyar maganar da zan rubuta wa mai girma sarkin Roma a kansa. Saboda haka na kawo shi gabanku, musamman gabanka, Sarki Agiriffa, domin bayan da muka bincike shi, ko zan sami abin da zan rubuta.

²⁷ Don ni a ganina, wawanci ne a aika da ɗan kurkuku, ba tare da an nuna laifofin da ya yi ba.”