Luka 2

¹ A kwanakin nan, Kaisar Augustus ya ba da umarni a ƙirga dukan mutanen da suke a ƙarƙashin mulkin Roma.

² Wannan shi ne ƙirga ta farko wadda aka yi lokacin da Kiriniyus yake mulkin ƙasar Suriya.

³ Dukan mutane suka koma garuruwansu domin a ƙirga su.

⁴ Yusuf ma ya bar garin Nazaret a cikin Galili ya je garin Betelehem a cikin yankin Yahudiya, wato garin da aka haifi Sarki Dawuda ke nan. Yusuf ya je can domin shi daga dangin Dawuda ne.

⁵ Ya tafi tare da Maryamu da aka yi alkawari zai aura, domin a ƙirga su tare. Lokacin nan kuwa tana da ciki.

⁶ Da suna can Betelehem, sai kwanakin haifuwarta suka yi.

⁷ Ta haifi ɗanta na fari, ta rufe shi da zanen goyo, ta kuma kwantar da shi a abin da ake ba dabbobi abinci a ciki, domin ba su sami ɗaki a masauki ba.

⁸ A wannan gefen ƙasar kuwa, akwai waɗansu makiyaya suna kwana a fili, suna lura da dabbobinsu da dare.

⁹ Ba labari sai ga malaˈikan Ubangiji ya bayyana gare su, kuma ɗaukakar Allah ta haskaka su. Sai suka ji tsoro sosai.

¹⁰ Amma malaˈikan ya ce musu, “Kada ku ji tsoro! Gama na zo muku da labari mai daɗi, wanda zai sa dukan mutane su yi farin ciki sosai.

¹¹ A yau ɗin nan, a cikin garin Dawuda, an haifa muku Mai Ceto, Almasihu Ubangiji!

¹² Wannan ne zai zama muku alama, za ku samu an naɗe jariri da zane, an kuma kwantar da shi a abin da ake ba dabbobi abinci a ciki.”

¹³ Ba labari sai ga ƙungiyar malaˈiku daga sama sun bayyana tare da malaˈika na farin, suna yabon Allah suna cewa,

¹⁴ “Ɗaukaka ga Allah a can cikin sama! A duniya bari salama ta kasance tare da waɗanda Allah yake jin daɗinsu!”

¹⁵ Da malaˈikun suka rabu da su suka koma sama, sai makiyayan suka ce wa junansu, “Bari mu je Betelehem mu ga abin nan da ya faru, da Ubangiji ya gaya mana.”

¹⁶ Sai suka tafi da sauri, suka ga Maryamu da Yusuf, suka kuma ga yaron yana kwance a abin da ake ba dabbobi abinci a ciki.

¹⁷ Da makiyayan suka gan shi sai suka ba da labarin abin da malaˈikan ya faɗa musu a kan yaron.

¹⁸ Dukan mutanen da suka ji wannan labari, sai suka yi ta riƙe baki suna mamakin abin da makiyayan nan suka ce.

¹⁹ Maryamu kuwa ta riƙe dukan waɗannan abubuwa, tana tunaninsu a zuciyarta.

²⁰ Makiyayan kuma suka koma, suna ta yin waƙoƙin yabon Allah, saboda dukan abin da suka ji, suka kuma gani. Kome ya faru kuwa kamar dai yadda malaˈikan ya faɗa musu.

²¹ Da yaron ya yi kwana takwas, sai aka yi masa kaciya, aka kuma ba shi suna Yesu, sunan da malaˈika ya bayar tun kafin a yi cikinsa.

²² Da lokaci ya kai da Maryamu da Yusuf za su yi abin da Koyarwar Musa ta ce a yi don tsabtacewa, sai suka ɗauki Yesu zuwa Urushalima domin su miƙa shi ga Ubangiji.

²³ Haka yake a rubuce a Koyarwar Ubangiji, “Duk ɗa na fari wanda aka haifa, za a keɓe shi da tsarki ga Ubangiji.”

²⁴ Suka kuma yi hadaya kamar yadda Koyarwar Ubangiji ta faɗa cewa, “Kurciyoyi biyu ko ˈyan tattabaru biyu ne za a yanka.”

²⁵ To, a wannan lokaci akwai wani mutumin da yake zama a Urushalima, da ake ce da shi Simeyon. Shi mutum mai adalci ne, mai bautar Allah, kuma yana jiran ranar da za a ceci Israˈila. Ruhu Mai Tsarki kuwa yana tare da shi.

²⁶ Ruhu Mai Tsarki ya faɗa masa cewa ba zai mutu ba sai ya ga Almasihun da Ubangiji ya yi alkawari zai aiko.

²⁷ Da Ruhu yana iza shi sai ya shiga Haikalin a lokacin da iyayen suka kawo Yesu Haikali domin su yi kamar yadda Koyarwar Musa ta ce a yi,

²⁸ sai Simeyon ya karɓi yaron a hannunsa ya yi wa Allah godiya ya ce,

²⁹ “Yanzu, ya Ubangiji, ka sallami bawanka lafiya, kamar yadda ka yi alkawari,

³⁰ gama idanuna sun ga cetonka,

³¹ ceton da ka shirya a gaban dukan mutane,

³² hasken da zai bayyana ka ga waɗanda ba Yahudawa ba, yă kuma kawo ɗaukaka ga mutanenka Israˈila.”

³³ Baban yaron da mamarsa suka riƙe baki, suna mamakin abubuwan nan da Simeyon ya faɗa a kansa.

³⁴ Simeyon ya sa musu albarka, ya ce wa Maryamu, mamar yaron, “Allah ya zaɓi yaron nan domin yă zama dalilin fāɗuwar waɗansu, da tashin waɗansu da yawa a cikin Israˈila. Zai zama alama daga wurin Allah wadda mutane da yawa ba za su so ba.

³⁵ Ta haka asirin zukatansu zai tonu. Abin nan kuwa zai yi miki zafi kamar takobi ne ya soki zuciyarki.”

³⁶ Akwai wata tsohuwar annabiya mai suna Hannatu, ˈyar Fanuwel na zuriyar Asher. Ta yi zaman aure na shekara bakwai ne kawai,

³⁷ sai mijinta ya mutu. Yanzu shekarunta tamanin da huɗu ne. Ba ta barin Haikali, tana yi wa Allah sujada dare da rana a wurin, tana adduˈa da azumi.

³⁸ Daidai wannan lokaci, sai ta shigo, tana yi wa Allah godiya, ta kuma yi magana game da yaron nan ga dukan waɗanda suke jiran Allah yă ba Urushalima ˈyanci.

³⁹ Da Yusuf da Maryamu suka gama yin dukan abubuwan da Koyarwar Ubangiji ta ce a yi, sai suka koma garinsu Nazaret a Galili.

⁴⁰ Yaron ya yi girma, ya kuma yi ƙarfi, yana cike da hikima. Alherin Allah kuma yana tare da shi.

⁴¹ Kowace shekara iyayen Yesu sukan je Urushalima don Bikin Ƙetarewa.

⁴² Da Yesu ya cika shekara goma sha biyu da haifuwa, sai suka je bikin kamar yadda suka saba.

⁴³ Da bikin ya ƙāre, suka kama hanya domin su koma gida, amma Yesu, ɗan yaron nan, ya tsaya a baya a Urushalima, ba da sanin iyayensa ba.

⁴⁴ Su kuma suna tsammani yana cikin jamaˈa, saboda haka suka yi ta tafiya har yini guda. Saˈan nan suka fara nemansa cikin ˈyanˈuwansu da kuma abokansu,

⁴⁵ amma ba su gan shi ba. Saboda haka suka koma Urushalima domin su neme shi a can.

⁴⁶ A rana ta uku suka same shi yana zama a cikin Haikali tare da malamai. Yana jinsu, yana kuma yi musu tambayoyi.

⁴⁷ Dukan waɗanda suka ji shi, suka riƙe baki, suna mamakin ganewarsa da yadda yake ba da amsoshi.

⁴⁸ Iyayensa kuma suka yi mamakin ganinsa a nan. Sai mamarsa ta ce masa, “Ɗana, don me ka yi mana haka? Ni da babanka mun damu sosai da ba mu gan ka ba.”

⁴⁹ Ya amsa musu ya ce, “Don me kuke nemana? Ba ku sani cewa ya kamata in kasance a gidan Ubana ba?”

⁵⁰ Amma ba su gane ko mene ne yake nufi da maganarsa nan ba.

⁵¹ Sai ya tashi ya bi su, suka koma Nazaret tare, inda ya dinga biyayya ga iyayensa. Mamarsa kuma ta riƙe dukan waɗannan abubuwa tana tunaninsu a zuciyarta.

⁵² Yesu ya yi ta ƙaruwa da hikima da tsayi, ya kuma sami farin jini a gaban Allah da kuma a gaban mutane.