John 13

¹ Bifor dem du di Passova Fist, Jisos no sey en taim don rish wen e go komot for dis wold go mit en Papa. Bikos e luv di pipol wey dey di wold, e kon show dem haw en luv for dem strong rish.

² Bifor dem start to chop evenin fud, devol don alredi enta Judas Iskarot maind, wey bi Saimon pikin, sey, mak e sel Jisos giv en enemi.

³ Bikos Jisos no sey en Papa don gi-am pawa to kontrol evritin and as e bi sey e kom from God and e dey go bak go mit am,

⁴ e kon stand-up for wer dem dey chop, rimov en big koat kon tie towel for en waist.

⁵ E kon pour wota for basin, bigin dey wosh en disaipols leg and dey dry dem wit di towel wey dey en waist.

⁶ Wen e rish Saimon Pita turn, Pita kon tel am, "Oga, yu won wosh my leg?"

⁷ Jisos ansa, "Yu nor go fit undastand wetin I dey du naw, bot yu go undastand am leta."

⁸ Pita kon tel am, "I nor go gri mak yu wosh my leg!" Den Jisos ansa, "If I nor wosh yor leg, mi and yu nor go get enitin togeda again."

⁹ So Saimon Pita tel am, "Oga, mak yu nor wosh onli my leg, bot mak yu wosh my hand and head tu!"

¹⁰ Jisos ansa, "Di pesin wey don baff, onli nid to wosh en leg, bikos e don dey klin. Una dey klin, bot nor bi all of una."

¹¹ (Bikos Jisos no di pesin wey go sel am, naim mak am sey, "Nor bi all of una dey klin.")

¹² So wen Jisos don wosh dia leg finish, e kon wear en big koat bak. Den e go sidan for di tabol kon ask dem, "Una undastand wetin I du for una so?

¹³ "Una dey kol mi 'Tisha' and 'Oga', una koret, bikos na so I bi.

¹⁴ "So, if mi, wey bi una oga and tisha, wosh una leg, e gud mak una wosh ish oda leg tu.

¹⁵ "I don giv una ezampol wey una go folo. So mak una du for ish oda as I don du for una."

¹⁶ "Mak I tel una tru wod, savant nor dey big pas en oga, jos as di pesin wey bi mesenga nor dey big pas di oga wey send am.

¹⁷ "Since una no wetin I dey tok, God go bless una, if una du dem."

¹⁸ "Wetin I dey tok so nor konsan all of una, bikos I no di pipol wey I shuz. Dis show sey God wod na tru, sey, 'Di pesin wey folo mi chop don turn to my enemi.'

¹⁹ "I don tel una bifor e go hapun, so dat wen e hapun, una go biliv sey na mi bi Kraist.

²⁰ "I dey tel una tru wod, enibodi wey risiv di pesin wey I send, don risiv mi and enibodi wey risiv mi, don risiv God wey send mi kom."

²¹ Wen e don tok dis tin finish, en heart kon heavi wel-wel, den e sey, "I dey tel una tru wod, won of una go sel mi giv my enemi."

²² Di disaipols luk ish oda kon dey wori and tink for dia maind sey, "Wish pesin e dey tok abaut?"

²³ Jon, di disaipol wey Jisos luv wel-wel, sidan for en rite hand wen dem dey chop.

²⁴ So, Saimon Pita kon yuz eye tel am sey mak e ask Jisos wish pesin e dey tok abaut.

²⁵ Den Jon bend en head near Jisos chest kon ask am, "Oga, hu yu dey tok abaut?"

²⁶ Jisos ansa, "Na di pesin wey I go giv dis bread afta I don shuk-am insaid di pot." Den e shuk di bread insaid di pot kon gi-am to Judas Iskarot, wey bi Saimon pikin.

²⁷ Afta Judas tak di bread, devol enta en maind. Jisos kon tel am, "Di tin wey yu won du, mak yu go du-am kwik-kwik."

²⁸ (None of dem wey sidan for di tabol undastand why Jisos tok to Judas laik dat.

²⁹ Som of dem tink sey, since na Judas dey kip di moni, Jisos tel am sey mak e go buy wetin dem go yuz for di fist or mak e giv poor pipol moni).

³⁰ Wen Judas don tak di bread, e huri komot for di place. (By dis taim, day don dak.)

³¹ Wen e don komot, Jisos kon sey, "Naw, di taim don rish wen God go onor en pikin and en pikin go onor am tu.

³² "Wen di pikin don onor God, God sef go onor am bak.

³³ "My shildren, na smol taim rimain wey I go dey wit una. Leta, una go dey faind mi and as I tel di Ju oga dem bifor sey, 'Wer I dey go una nor go fit kom der', na di same wod I dey tel una naw.

³⁴ "I dey giv una new komand: Una must luv ish oda, as I luv una,

³⁵ so dat evribodi go no sey una bi my disaipols, if una luv ish oda."

³⁶ Saimon Pita kon tel am, "Oga, wer yu dey go?" Jisos ansa, "Una nor go fit folo mi go di place wey I dey go naw, bot una go kom mit mi for der leta."

³⁷ Pita ask am, "Oga, why wi nor go fit folo yu naw? I redi to die bikos of yu!"

³⁸ Jisos ansa am, "Yu rili redi to die for mi? Mak I tel yu tru wod, bifor fawo go du 'Kukuruku' dis nite, yu go tok tiri taims sey, yu no mi."