Matiyu 9

¹ Sai Yesu ya shiga jirgin ruwa, ya haye tekun ya je Kafarnahum, garin da ya yi girma.

² Sai aka kawo masa wani shanyayye yana kwance a kan tabarma. Da Yesu ya ga bangaskiyarsu, sai ya ce wa shanyayyen, “Kada ka damu, ɗana, an gafarta maka zunubanka.”

³ Da jin wannan, waɗansu malaman Koyarwar Musa suka ce wa junansu, “Wannan mutumin yana yi wa Allah saɓo.”

⁴ Amma Yesu ya san abin da suke tunani a kai, sai ya ce musu, “Don me kuke yin mugun tunani a zuciyarku haka?

⁵ Wanne ya fi sauƙi, a ce, ‘An gafarta maka zunubanka,’ ko kuwa a ce, ‘Tashi ka yi tafiya’?

⁶ Amma ina so ku sani cewa Ɗan Mutum yana da iko yă gafarta zunubai a duniya.” Sai ya ce wa shanyayyen, “Tashi, ka ɗauki tabarmarka, ka tafi gida.”

⁷ Mutumin kuwa ya tashi ya tafi gidansa.

⁸ Da taron mutanen suka ga haka sai suka ji tsoro, suka ɗaukaka Allah wanda ya ba mutane irin wannan iko.

⁹ Da Yesu ya ci gaba da tafiya, sai ya ga wani mutum wanda ake ce da shi Matiyu, yana zaune a wurin karɓar haraji. Sai Yesu ya ce masa, “Bi ni.” Sai ya tashi ya bi shi.

¹⁰ Daga baya, da Yesu yana cin abinci a gidan Matiyu, sai masu karɓar haraji da masu zunubi da yawa suka zo suka zauna tare da shi da almajiransa.

¹¹ Da Farisiyawa suka ga haka, sai suka ce wa almajiransa, “Don me malaminku yake cin abinci tare da masu karɓar haraji da masu zunubi?”

¹² Da Yesu ya ji wannan sai ya ce, “Masu lafiya ba sa bukatar likita, sai dai marasa lafiya.

¹³ Ku je ku koyi abin da wannan yake nufi, ‘Jinƙai nake so a wurinku, ba hadaya ba.’ Gama ban zo domin in kira masu adalci ba, sai dai domin masu zunubi.”

¹⁴ Ana nan sai almajiran Yohanna Mai Baftisma suka zo wurin Yesu suka ce masa, “Me ya sa mu da Farisiyawa mukan yi azumi, amma almajiranka ba sa yi?”

¹⁵ Sai Yesu ya amsa musu ya ce, “Abokan ango za su yi baƙin ciki tun ango yana tare da su ne? Ai, kwanaki suna zuwa da za a ɗauki angon a bar su. A lokacin ne za su yi azumi.

¹⁶ “Ba wanda zai yi facin tsohuwar riga da sabon yadi, gama facin zai naɗe rigar, yagewar ma za ta fi ta dā.

17Ba wanda zai zuba sabon ruwan inabi a cikin tsofaffin salkuna. Idan ma an zuba, salkunan za su fashe, ruwan inabin kuma yă zube, salkunan kuma su lalace. Sabon ruwan inabi dai, sai a zuba shi a cikin sababbin salkuna. Da haka ba za a rasa ko ruwan, ko kuma salkunan ba.”

¹⁸ Yesu yana kan gaya musu haka ke nan, sai ga wani shugaban majamiˈa ya zo ya durƙusa a gabansa ya ce, “ˈYata ta mutu ba da jimawa ba, ka zo ka taɓa ta, za ta tashi.”

¹⁹ Yesu kuwa ya tashi tare da almajiransa, suka bi mutumin.

²⁰ Sai ga wata mata da ta yi shekara goma sha biyu tana fama da ciwon zubar da jini, ta zo ta bayansa ta taɓa bakin rigarsa,

²¹ gama ta ce a ranta, “Idan na taɓa ko da rigarsa kawai, zan warke.”

²² Da Yesu ya juya ya gan ta, sai ya ce, “Kada ki damu ˈyata. Bangaskiyarki ta warkar da ke.” Nan take matar ta warke.

²³ Da Yesu ya zo gidan shugaban, ya ga masu busa sarewa da taron mutane ana ta hayaniya.

²⁴ Sai ya ce, “Ku tashi daga nan! Yarinyar ba ta mutu ba, tana barci ne kawai.” Sai suka yi masa dariyar reni.

²⁵ Amma da aka kore su waje, sai ya shiga ya kama hannun yarinyar, sai ta tashi.

²⁶ Labarin kuwa ya bazu duk cikin wannan yanki.

²⁷ Yesu yana barin wurin ke nan, sai makafi biyu suka bi shi suna kira da ƙarfi suna cewa, “Ka yi mana jinƙai, ya kai Ɗan Dawuda!”

²⁸ Da Yesu ya shiga wani gida sai makafin suka zo wurinsa, ya ce musu, “Kun ba da gaskiya zan iya warkar da ku?” Suka ce masa, “I, Ubangiji.”

²⁹ Saˈan nan ya taɓa idanunsu ya ce, “Bisa ga bangaskiyarku za a warkar da ku.”

³⁰ Sai idanunsu suka buɗe. Saˈan nan Yesu ya ja musu kunne sosai ya ce, “Kada ku faɗa wa kowa wannan.”

³¹ Amma suka fita suka yi ta baza labarinsa koˈina a ƙasar.

³² Da za su tafi, sai aka kawo wani da aljani ya hana shi magana.

³³ Da aka fitar da aljanin, wannan da ba ya iya magana kuwa ya fara magana. Taron mutane kuwa suka yi mamaki suka ce, “Ba a taɓa ganin wani abu kamar haka a Israˈila ba.”

³⁴ Amma Farisiyawa suka ce, “Ai, da ikon shugaban aljanu ne yake fitar da aljanun.”

³⁵ Daga nan Yesu ya bi dukan garuruwa da ƙauyuka, yana koyarwa a majamiˈu, yana shelar labari mai daɗi na mulkin Allah, yana kuma warkar da mutane daga kowane irin ciwo da rashin lafiya.

³⁶ Da ya ga jamaˈa sun taru da yawa, sai ya ji tausayinsu, gama suna shan wahala kuma ba mai taimako, kamar tumakin da ba su da makiyayi.

³⁷ Sai ya ce wa almajiransa, “Girbin yana da yawa, amma masu aikin kaɗan ne.

³⁸ Saboda haka ku roƙi Ubangijin girbin yă aiko da masu aiki su yi masa girbi.”