Luka 21

¹ Yesu ya ɗaga kai ya ga waɗansu masu kuɗi suna sa baikonsu a wurin zuba baiko.

² Sai ya ga wata matalauciyar da mijinta ya mutu ta zo ta sa baiko na ˈyan tagulla biyun da ba su kai kobo ba.

³ Sai Yesu ya ce, “Hakika ina gaya muku, baikon da matalauciyar nan ta sa, ya fi na sauran duka.

⁴ Gama dukansu sun bayar daga yawan abin da suke da shi ne, amma ita kuwa cikin rashinta ta sa duk ɗan kuɗin da take da shi a rayuwarta.”

⁵ Waɗansu suka fara magana a kan Haikali, da adon duwatsu masu darajar da aka gina shi da su, da kuma irin kyautan da aka yi masa ado da su. Sai Yesu ya ce,

⁶ “Game da abubuwan nan da kuke kallo ne, to, lokaci yana zuwa da ba wani dutsen da za a bari nan a kan ɗanˈuwansa, kowannensu za a rushe shi.”

⁷ Sai suka tambaye shi suka ce, “Malam, yaushe wannan zai faru? Wace alama ce kuma za a gani saˈad da abubuwan nan za su faru?”

⁸ Sai ya ce musu, “Ku lura fa, kada wani yă ruɗe ku. Domin mutane da yawa za su zo a cikin sunana, suna cewa, ‘Ai, ni ne shi!’ da kuma, ‘Lokaci ya yi!’ Kada fa ku bi su.

⁹ Kada ma ku ji tsoro in kun ji labarin yaƙe-yaƙe da tashin hankali. Lallai ne wannan yă fara zuwa, amma ƙarshen bai zo ba tukuna.”

¹⁰ Ya ci gaba da cewa, “Alˈumma za ta tasar wa alˈumma, mulki yă tasar wa mulki.

¹¹ Za a yi mummunar rawar ƙasa, da yunwa da balaˈi a wurare dabam-dabam. Za a ga abubuwa masu ban tsoro da alamu masu ban mamaki suna fitowa daga sama.

¹² Kafin duk abubuwan nan su faru, za su kama ku, su ba da ku don a tsananta muku. Za a kai ku gaban majamiˈu a kuma sa ku a kurkuku. Za a kuma kai ku gaban sarakuna da shugabanni saboda sunana.

¹³ Wannan ne zai ba ku dama ku yi shaidar labarina.

¹⁴ Saboda haka sai ku shirya a ranku tun da wuri a kan ba za ku damu da yadda za ku kāre kanku ba.

¹⁵ Gama zan ba ku kalmomi da hikima yadda ko ɗaya daga cikin masu gāba da ku ba zai iya juye maganar ko yă yi musūn abin da kuka ce ba.

¹⁶ Har iyayenku ma, da ˈyanˈuwanku, da danginku, da abokanku za su bashe ku, su kuma sa a kashe waɗansunku.

¹⁷ Kowa zai ƙi ku saboda sunana.

¹⁸ Amma ba ko ɗaya daga cikin gashin kanku da zai ɓata.

¹⁹ Idan kuka jimre, za ku tsira.

²⁰ “Saˈad da kuka ga sojoji sun kewaye Urushalima, za ku sani cewa an yi kusa a rushe ta.

²¹ To, sai waɗanda suke cikin yankin Yahudiya, su gudu zuwa cikin tuddai. Waɗanda suke a birni kuma su fita, waɗanda suke a ƙauye kuma kada su shiga birnin.

²² Gama kwanakin nan kwanakin hukunci ne, don dole ne a cika duk abin da Rubutacciyar Maganar Allah ta ce.

²³ Kaiton mata masu ciki da masu goyo a wannan lokaci! Gama mummunar wahala za ta shiga ƙasar, kuma fushin Allah zai sauko a kan mutanen nan.

²⁴ Za a kashe waɗansu a yaƙi, a kuma kama waɗansu a kai su bauta a waɗansu ƙasashe. Waɗanda ba Yahudawa ba za su tsananta wa Urushalima, har sai lokacinsu ya cika.

²⁵ “Za a kuma ga alamu masu ban tsoro a jikin rana, da wata, da taurari. A duniya kuma alˈummai za su rikice don tsoro saboda tafasa da haukan teku.

²⁶ Mutane za su yi suma don tsoro, za su kuma razana da ganin abubuwan da suke faruwa ga duniya. Gama za a girgiza ikokin sararin sama.

²⁷ Saˈan nan za a ga Ɗan Mutum yana zuwa a cikin girgije tare da iko da ɗaukaka mai yawa.

²⁸ Idan waɗannan abubuwa suka fara faruwa, ku shirya kanku sosai domin cetonku ya yi kusa.”

²⁹ Sai Yesu ya ba su wani misali ya ce, “Ku duba itacen ɓaure da sauran itatuwa mana.

³⁰ Da zarar sun fara fitar da sababbin ganye, ku da kanku kun san cewa damina ta yi kusa ke nan.

³¹ Haka ma, idan kuka ga waɗannan abubuwa suna faruwa, ku sani mulkin Allah ya yi kusa.

³² “Hakika ina gaya muku mutanen zamanin nan ba za su mutu ba sai dukan abubuwan nan sun faru.

³³ Sama da duniya za su shuɗe, amma kalmata ba za ta shuɗe ba ko kaɗan.

³⁴ “Ku zauna a shirye fa. Kada ku bar ciye-ciye, da buguwa, da damuwar rayuwar duniya su ɗauki hankalinku. Idan ba haka ba, Ranar nan za ta zo ba labari ta cafke ku

³⁵ kamar tarko. Gama za ta zo a kan kowa da yake zama a duniya duka.

³⁶ Ku zauna a shirye fa, kuna adduˈa kullum don ku sami ƙarfin kuɓuce wa dukan waɗannan abubuwan da za su faru, ku kuma tsaya a gaban Ɗan Mutum.”

³⁷ Kowace rana, Yesu yakan yi koyarwa a Haikali, amma idan yamma ta yi sai yă fita yă je Tudun Itatuwan Zaitun yă kwana a can.

³⁸ Da sassafe kuma dukan mutane sukan zo wurinsa a Haikali su ji shi.