Matiyu 20

¹ “Mulkin sama kamar wani maigida ne wanda ya fita da sassafe domin yă yi hayar waɗanda za su yi masa aiki a gonarsa ta itatuwan inabi.

² Da suka shirya a kan kuɗin da ake biyan lebura a yini, sai ya aika su gonarsa.

³ Wajen ƙarfe tara kuma da ya fita, sai ya ga waɗansu suna zaman banza kawai a bakin kasuwa,

⁴ sai ya ce musu, ‘Ku ma ku je gonata, zan biya ku abin da ya kamata.’ Sai suka tafi.

⁵ Da ya sāke fita da rana, da kuma wajen ƙarfe uku, ya ɗauki masu aiki.

⁶ Har yanzu wajen ƙarfe biyar ya sāke fita ya ga waɗansu suna tsaye ba sa yin kome, sai ya ce musu, ‘Don me kuke zaman banza duk yini?’

⁷ “Suka ce masa, ‘Gama ba wanda ya ba mu aikin yi.’ “Sai ya ce musu, ‘Ku ma ku je gonata.’

⁸ “Da yamma ta yi, sai mai gonar ya ce wa mai taimakonsa lura da aikin gonar, ‘Ka kira maˈaikatan ka biya su, ka fara daga na ƙarshe zuwa na farko.’

⁹ Waɗanda suka je wajen ƙarfe biyar suka zo, kowannensu ya karɓi abin da ya kamata a biya shi a yini.

¹⁰ To, waɗanda suka fara zuwa sun yi tsammani za a biya su fiye da sauran, amma su ma kowannensu ya karɓi abin da ya kamata a biya shi a yini.

¹¹ Da suka karɓa, suka yi wa maigidan gunaguni,

¹² suna cewa, ‘Waɗanda suka zo daga ƙarshe, aikin awa ɗaya kawai suka yi, ka mai da su daidai da mu, mu da muka yini muna aiki, ga shan rana.’

¹³ “Sai ya amsa wa ɗaya daga cikinsu ya ce, ‘Abokina, ai, ban cuce ka ba. Ba mu shirya a kan cewa zan biya ka abin da akan biya a yini ba?

¹⁴ Ka karɓi abin da yake naka ka tafi. Ni na ga damar in biya waɗanda suka zo daga baya daidai da abin da na biya ka.

¹⁵ Ba ni da iko in yi abin da na ga dama da abin da yake nawa? Ko kana jin kishi ne saboda ina da alheri a yalwace?’

¹⁶ “Haka na ƙarshe za su zama na farko, na farko kuma za su zama na ƙarshe.”

¹⁷ Da Yesu da almajiransa suna haurawa zuwa Urushalima, sai Yesu ya ja su gefen hanya ya ce musu,

¹⁸ “Ga shi, za mu je Urushalima. Za a ba da Ɗan Mutum a hannun manyan firistoci da malaman Koyarwar Musa, za su kuma yanke masa hukuncin kisa.

¹⁹ Saˈan nan su ba da shi ga waɗanda ba Yahudawa ba, su yi masa baˈa, su yi masa bulala, su kuma gicciye shi, a rana ta uku kuma za a tashe shi.”

²⁰ Saˈan nan sai mamar ˈyaˈyan Zabadi ta zo wurin Yesu da ˈyaˈyanta, ta durƙusa a gabansa ta roƙe shi wani abu.

²¹ Sai ya ce mata, “Me kike so?” Ta ce masa, “Ka sa waɗannan ˈyaˈyana biyu su zauna, ɗaya a damanka, ɗaya a hagunka, a cikin mulkinka.”

²² Amma Yesu, ya ce wa ˈyaˈyan, “Ba ku san abin da kuke roƙo ba, za ku iya sha a kwaf na wahalar da zan sha?” Suka ce masa, “Za mu iya.”

²³ Ya ce musu, “Lallai za ku sha a kwaf nawa, amma zama a damana ko haguna ba ni nake da ikon bayarwa ba. Ubana na sama ya shirya matsayin nan don waɗanda ya zaɓa.”

²⁴ Da sauran almajiran goma suka ji haka, sai suka ji haushin ˈyanˈuwan nan guda biyu.

²⁵ Amma Yesu ya kira su duka ya ce, “Kun san yadda sarakunan waɗanda ba Yahudawa ba sukan nuna iko a kan mutanensu, manyansu ma suna nuna wa mutanensu iko.

²⁶ Ba zai zama haka a cikinku ba. A maimakon haka duk wanda yake so yă zama babba a cikinku dole ne yă zama mai yi wa sauran hidima.

²⁷ Kuma wanda yake so yă zama shugaba a cikinku, dole ne yă zama bawanku.

²⁸ Haka kuma Ɗan Mutum bai zo domin a bauta masa ba, sai dai domin yă yi bauta, yă kuma ba da ransa domin ceton mutane da yawa.”

²⁹ Da Yesu da almajiransa za su bar Yeriko, mutane da yawa suka bi shi.

³⁰ Sai ga waɗansu makafi biyu suna zaune a gefen hanya. Da suka ji Yesu yana wucewa, sai suka ɗaga murya suka ce, “Maigirma, Ɗan Dawuda! Ka ji tausayinmu!”

³¹ Mutane suka yi musu faɗa su yi shiru. Sai suka ƙara ɗaga murya suka ce, “Maigirma, Ɗan Dawuda! Ka yi mana jinƙai!”

³² Sai Yesu ya tsaya ya ce musu, “Me kuke so in yi muku?”

³³ Suka ce masa, “Maigirma, bari mu sami ganin gari.”

³⁴ Saboda tausayi, sai Yesu ya taɓa idanunsu. Nan da nan kuwa suka fara gani, suka bi shi.