John 16

¹ "I dey tel una all dis tins, so dat nobodi go fit disiv una.

² "Dem go driv una komot for di sinagog and di taim dey kom wen di pesin wey go kil una, go tink sey e dey du God wok.

³ "Dem go du all dis tins, bikos dem nor no mi and my Papa.

⁴ "Bot I tel una all dis tins, so dat wen di taim rish, una go rimemba sey I tel una abaut dem bifor. I jos dey tel una all dis tins, bikos I dey wit una since.

⁵ "Naw, I dey go mit di Pesin wey send mi kom, bot una dey ask mi, 'Wer yu dey go?'

⁶ "Bot una nor hapi as I dey tel una all dis tins.

⁷ "I tel una tru wod, na for una own gud naim mak mi won go, bikos if I nor go, di Pesin wey go help una nor go kom, bot if I go, I go send am kom mit una.

⁸ "Wen e kom, e go show pipol for dis wold wetin sin, God raitiousnes and God jojment, bi.

⁹ "Di Spirit go show dem sey dem dey wrong abaut sin, bikos dem nor biliv mi.

¹⁰ "Dem dey wrong abaut God raitiousnes, bikos I dey go mit my Papa and dem nor go si mi again.

¹¹ "And dem dey wrong abaut jojment, bikos God don kondem di pesin wey dey rule dis wold.

¹² "I get plenti tins wey I won tel una, bot una nor go fit bear dem naw.

¹³ "Bot wen God Spirit kom, e go show una di trut. E nor go tok wetin dey en maind, bot e go tok wetin e hear from God and wetin go hapun afta I don go.

¹⁴ "E go dey giv mi glori wen e dey tel una di tins wey e dey hear from mi.

¹⁵ "Evritin wey my Papa get, na my own, naim mak mi tok sey di Spirit go tel una wetin e dey hear from mi.

¹⁶ "Taim go soon kom wen una nor go si mi, bot afta som taim, una go si mi."

¹⁷ Den som of di disaipol kon dey ask ish oda, "Wetin e min wen e sey, 'Taim go soon kom wen una nor go si mi, bot afta som taim, una go si mi bikos I dey go mit my Papa?'"

¹⁸ Som of dem stil sey, "Wetin e get for maind wen e sey, 'Taim go soon kom?' Wi nor undastand wetin e dey tok."

¹⁹ Jisos si sey dem won ask am abaut wetin e tel dem, naim e ask dem, "Una dey ask ish oda wetin I min wen I sey, 'Taim go soon kom wen una nor go si mi, bot afta som taim, una go si mi?'

²⁰ "I tel una tru wod, una go krai and mourn, bot di wold go dey hapi; una go dey sad wel-wel, bot una sadnes go turn to hapines.

²¹ "Wen wuman won born pikin, e dey sofa strong pain, bikos en taim to born don rish, bot wen e don born, e go hapi and e nor go rimemba di pain again, bikos e go si sey e don born pikin.

²² "Na so e bi to una naw, bikos una heart dey heavi, bot I go si una again and for dat taim, una go dey hapi and nobodi go fit tak di hapines from una.

²³ "By dat taim, una nor go ask mi enitin again. I tel una tru wod sey, enitin wey una ask my Papa wit my name, E go giv una.

²⁴ "Bifor naw, una neva tak my name ask for enitin. Naw mak una yuz my name ask for enitin wey una wont and una go get-am, so dat una joy go ful wel-wel.

²⁵ "Since I dey yuz parabol tok to una; bot di taim dey kom wen I nor go yuz parabol again, bot I go tel una abaut my Papa for di way wey una go undastand.

²⁶ "By dat taim, una go fit ask enitin wit my name and God go du-am for una.

²⁷ "My Papa luv una, bikos una luv mi and biliv sey na-im send mi.

²⁸ "Na my Papa send mi kom dis wold, bot naw, I dey go bak go mit am."

²⁹ En disaipols kon sey, "Yu si, na naw yu dey tok for di way wey wi undastand and nor bi wit parabol.

³⁰ "Naw wi no sey yu no evritin and yu nor nid enibodi to ask yu eni kweshon. Bikos of dis, wi biliv sey na God send yu kom."

³¹ Jisos kon tel dem, "So una don biliv naw?

³² "Luk, di taim dey kom and e don ivun rish, wen una go skata and evribodi go-go en own way and I go stay alone. Bot I nor dey alone, bikos my Papa dey wit mi.

³³ "I don tel una all dis tins, so dat my peace go stay wit una. Wahala ful insaid di wold and sofa dey tu, bot mak una heart dey strong, bikos I don alredi win di wold."