Hebrews 1

¹ Bifor-bifor, God tok to awa gran-gran papa dem for meni ways, tru di profets,

² bot naw, E dey tok to us tru en pikin wey get evritin and na tru am, E kreate di wold.

³ Na dis pikin bi God image and e dey show God glori. Naim dey kip evritin wey dey dis wold wit en pawa. Afta e don die mak God for forgiv evribodi dia sins, e kon go sidan for God rite side for hevun.

⁴ E big pas di angels, jos as di name wey God gi-am big pas angels own tu.

⁵ Na wish angel God tel sey, "Yu bi my pikin, today I don bikom yor Papa"? Or as E tok for anoda place sey, "I go bi yor Papa and yu go bi my pikin?"

⁶ Bot wen God won send en first born enta dis wold, E sey: "Mak all my angels woship am."

⁷ God tok abaut di angels sey, "I mak my angels and my savants spirit to dey burn laik fire,"

⁸ bot konsanin en pikin, E sey, "Yu bi God! Yor kindom go dey foreva and eva and yu go rule yor pipol wit autoriti.

⁹ "Yu luv to du gud and yu hate wikednes. So God, wey bi yor God don anoint yu wit oil wey dey bring joy and E mak yu dey above yor mates."

¹⁰ E stil tel di pikin sey, "For di biginin, na God kreate di eart and na wit en hand E tak mak di hevuns.

¹¹ "Dem go skata, bot God go dey foreva. All of dem go grow kon old laik klot

¹² and laik klot and koat, God go fold and shange dem, bot God nor dey shange and en life nor go eva end."

¹³ Na wish angel God tel, "Sidan for my rite hand ontil I go put all yor enemis unda yor leg"?

¹⁴ All di angels na savants and na dem God send go prish for pipol wey go get salvashon.