Exodus 24

¹ God come tell Moses say, "Come meet me for mountain, you and Aaron, Nadab, Abihu, and seventy of Israel leaders; and when una don reach some distance away, make una bow down in worship.

² Na only you fit come near me. Make the people no even near the mountain."

³ Moses come go tell the people all the command and instruction wey God don give am, and all people answer together say, "We go do everything wey God don talk."

⁴ Moses write down all God command. Early next morning he build altar for foot of mountain and he set twelve stones each for twelve tribes of Israel.

⁵ He come send young men make dem go burn sacrifice for God and dem sacrifice some cattle for fellowship offering.

⁶ Moses take half of the animal blood and put am for bowl; and he splash the other half against the altar.

⁷ Naso he take the covenant book wey dem write God command. And he read am loud to the people. Dem say, "We go obey the LORD and do everything wey he don command."

⁸ Moses come take the blood wey dey inside bowl and begin dey throw on people. He say, "Na the blood wey seal the covenant wey God make with una when he give these command be this."

⁹ Moses, Aaron, Nadab, Abihu, and seventy Israel elders come go up for mountain

¹⁰ and dem see God of Israel. Under him feet na something wey look like sapphire, and e blue like sky.

¹¹ God no harm leaders of Israel; dem see God, and dem eat and drink together.

¹² God come tell Moses say, "Come to me for mountain, and when you reach here, I go give you two stone tablet wey contain all the laws wey I don write for instruction of the people."

¹³ Moses and him helper Joshua come ready, and Moses begin dey go up the holy mountain.

¹⁴ Moses come tell the leaders say, "Wait here for us in camp till we come back. Aaron and Hur dey with una; and anybody wey get issue to settle fit go meet them."

¹⁵ Moses come go up to Mount Sinai, and cloud cover am.

16-

¹⁷ Light of God presence come down for the mountain. The light look like say fire dey burn on top mountain to the Israelites. The cloud come cover the mountain for six days, and on seventh day God call Moses from the cloud.

¹⁸ Moses come go up the mountain and enter the cloud. Na there he stay for forty days and forty nights.