Psalms 7

¹ O LORD, My God, I come to you make you protect me; rescue me and save me from all wey dey pursue me,

² or else dem go carry me away like lion, wey nobody fit save, and for there dem go tear me to pieces.

³ O LORD, my God, if I don do bad to anybody,

⁴ if I don betray any friend or cause trouble to my enemy – if I don do anything like this –

⁵ then make my enemy pursue me and catch me, make dem cut me down and kill me and make dem leave me dead for ground.

⁶ O LORD, make you use vex rise! Stand up against the anger of my enemies; rise by yourself make u help me! Na justice be wetin you dey ask for,

⁷ So, make you bring all the people together round you, and rule on top them from above.

⁸ Na you be the judge of human being. Judge in my favor, O LORD; you know say I dey innocent.

⁹ Na you be righteous God wey dey judge wetin we think and want. Make you stop the wickedness of the evil people and reward those wey dey good.

¹⁰ God na my protector; he dey save those wey obey him.

¹¹ God na righteous judge and him dey always condemn the wicked.

¹² If dem no change for their ways, God go sharpen him sword. Him go bend him bow and make am ready;

¹³ he go carry him dangerous weapon and point him arrow wey get fire.

¹⁴ See how wicked people dey think of evil; dem dey plan trouble and cunning things.

¹⁵ But for the trap wey dem set for others, the trap go catch them.

¹⁶ Na their evil go punish them and dem go get wound by their own violence.

¹⁷ I thank God for him justice, I sing praise to the LORD, Most High.