Psalms 39

¹ I talk say, “I go dey careful about wetin I dey do and I no go allow my tongue make me sin; I no go talk anything when evil people dey near.’’

² I been dey quiet, I no even say one word, I no even talk anything good; but my suffer just dey increase join,

³ And worry take over me. The more I dey think, the more my trouble dey increase; I no fit stop to dey ask say:

⁴ ‘‘LORD, how long I go still live? When I go die? Tell me how soon my life go end.’’

⁵ You don make my life short! For your eye my lifetime be like nothing. For sure, every living being no pass puff of wind to you,

⁶ Dem no pass shadow. All we dey do na nothing; we dey gather wealth, but we no know who go collect am.

⁷ God, wetin I fit come dey hope for? I put my hope in you.

⁸ Make you save me from my sin, no allow fools laugh at me.

⁹ I go keep quiet and I no go talk one word, because na you make me suffer like this.

¹⁰ No punish me again; your blow don almost kill me already.

¹¹ You dey punish our sin by condemning us, and you dey destroy wetin we love like moth. For sure, we no pass puff of wind to you!

¹² God, make you hear my prayer and hear as I dey cry; come rescue me as I dey cry. Just like all my ancestor, I be your guest for a while.

¹³ Make you leave me alone make I get happiness small before I commot and no dey alive again.