Psalms 17

¹ O LORD, hear as I dey beg for justice; hear the way I dey cry for help, listen to my prayer wey dey honest.

² You go judge in my favor, because you know wetin dey right.

³ You know as my heart be. You don come meet me for night; you don check me well and you no see any evil inside me.

⁴ I no talk evil as others dey do; I don obey your command and I never follow violent way.

⁵ I dey always waka for your way and I never leave am.

⁶ I dey pray to you, O God, because you dey answer me; so make you turn to me and listen to wetin I dey talk.

⁷ Show your love and save me; for your side I dey safe from enemy.

⁸ Protect me as you go do to your own eyes; hide me under your wing shadow

⁹ from wicked people attack. Deadly enemy dey surround me;

¹⁰ dem no get pity and dem dey talk with pride.

¹¹ Dem dey around me now, anywhere wey I turn, dem dey watch for time wey dem go pull me down.

¹² Dem be like lions, wey dey wait for me, wey wan tear me to pieces.

¹³ O LORD, make you come against my enemy and defeat them; use your sword save me from the wicked;

¹⁴ save me from those wey get all dem want in this life. Punish them with suffer wey you don keep for them; make some remain for there children.

¹⁵ But I go see you, because I never do anything wrong; and when I wake, your presence go fill me with joy.