Psalms 115

¹ O LORD, na to you alone, and no be to us, suppose dey get glory, because of your love wey no dey change and faithfulness.

² Why nations go dey ask us say, “Where una God dey?”

³ Our God dey for heaven; he dey do anything wey him like.

⁴ Na silver and gold dem use make their god, dem use their own hand form am.

⁵ Dem get mouth, but dem no fit talk, and dem get eyes, but dem no fit see.

⁶ Dem get ear, but dem no fit hear, and dem get nose but dem no fit smell.

⁷ Dem get hand, but dem no dey feel, and dem get feet, but no fit waka; dem no fit make any sound.

⁸ Make those wey make them and trust in them be like the idols wey dem don make.

⁹ Una wey dey for Israel, make una trust in the LORD. He dey help una and protect una.

¹⁰ Make una priest of God trust in the LORD. He dey help una and protect una.

¹¹ All of una wey dey worship him, make una trust in the LORD. He dey help una and protect una.

¹² God dey remember us and he go bless us; he go bless the people of Israel and all priest of God.

¹³ Him go bless everybody wey honor him, the big and small the same way.

¹⁴ God go give una pikin - una and una descendants!

¹⁵ The LORD wey make heaven and earth go bless una!

¹⁶ Na only the LORD get heaven, but him give us wey be human the earth.

¹⁷ Dead people no fit praise the LORD. Those wey dey inside grave no dey praise the LORD.

¹⁸ But we go give thanks to him now and forever! Praise the LORD!