Psalms 108

¹ O God, I get complete confidence! I go sing and praise you! My soul, make you wake up!

² My harp and lyre, make una wake up! I go wake up the sun.

³ O LORD, I go thank you among the people, and I go praise you among nations.

⁴ Your love wey no dey change high pass heaven; and your faithfulness dey touch skies.

⁵ O God, show your greatness for sky, and show your glory on top all the earth.

⁶ Use your power save us; answer my prayer, so that the people wey you love go dey safe.

⁷ God don talk from him sanctuary say, “In victory I go share Shechem and Sukkoth Valley to my people.

⁸ Gilead na my own, and Manasseh too; Ephraim na my helmet and Judah na my royal staff.

⁹ But I go use Moab as my wash bowl, and I go throway my sandal on top Edom, as sign say na me get am. I go shout victory over Philistines.”

¹⁰ O God, who go take me enter the strong city? Who go lead me go Edom?

¹¹ Shey you don really reject us? You no go march out with your army?

¹² Help us against the enemy; human help dey useless.

¹³ We go win with God on our side; him go defeat our enemy.