Proverbs 2

¹ My pikin, make you learn wetin I dey teach you, and no forget wetin I tell you say make you do.

² Make you listen to wetin dey wise and try understand am.

³ Yes, make you beg for knowledge, beg for understanding.

⁴ Look hard for am like say you dey find silver or some treasure wey dey hidden.

⁵ If you look for am, you go know wetin e mean to dey fear God and you go succeed to dey learn about God.

⁶ Na God dey give wisdom; knowledge and understanding dey come from him.

⁷ He dey provide help and protection for those wey dey righteous and honest.

⁸ He dey protect those wey dey treat others well, and he dey guard those wey dey loyal to him.

⁹ If you listen to me, you go know wetin dey right, just and fair. You go know wetin you suppose do.

¹⁰ You go become wise, and your knowledge go give you enjoyment.

¹¹ Your knowledge and understanding go protect you

¹² and e go prevent you from doing wrong thing. Dem go keep you away from people wey dey cause trouble with wetin dem talk-

¹³ Those wey don abandon righteous life to dey live for darkness of sin,

¹⁴ Those wey enjoy to dey do wrong thing and wey dey enjoy senseless evil,

¹⁵ People wey no dey responsible, wey person no fit trust.

¹⁶ You go fit hold yourself against any immoral woman wey dey try seduce you with her smooth talk,

¹⁷ Wey no dey faithful with her own husband and wey don forget her holy vows.

¹⁸ If you con go her house, you dey travel the road to death be that. To go there na to approach world of the dead.

¹⁹ Nobody wey don visit her don ever come back. He no dey return to road of life.

²⁰ So, make you dey follow example of good people and live a righteous life

²¹ Righteous people- people of integrity - go live for this our land.

²² But God go snatch the wicked from the land and he go pull sinners commot from am like say person commot plants from ground.