Philemon 1

¹ Na Pol, wey bi prizina bikos of Jisos Kraist and awa broda Timoti rite dis leta to Filemon, awa dear broda and co-woka.

² And to Afia awa sista, Arkippus awa felow soja and di shosh wey dey mit for en haus.

³ Mak God and awa Oga Jisos Kraist giv una grace and peace.

⁴ Evritaim wey I rimemba yu for my prayas, I dey tank my God,

⁵ bikos I don hear abaut di fate and luv wey yu get for awa Oga Jisos Kraist and all God pipol,

⁶ so I dey pray sey di fate wey yu get go mak yu undastand all di blessins wey bi yor own insaid Kraist.

⁷ I get joy and my heart dey strong bikos of yor luv and tru yu, all God pipol heart don strong tu.

⁸ Since I get strong biliv for Kraist sey, I fit tel yu mak yu du wetin dey rite,

⁹ mi, Pol, wey bi old man and prizina bikos of Kraist, won advise yu wit luv.

¹⁰ I beg, mak yu dey kaind to Onesimus, wey bi my pikin for God wok and e dey prizin wit mi.

¹¹ Bifor, e nor dey yuzful to yu, bot naw, e dey yuzful to mi and yu.

¹² I dey send am kom bak kom mit yu (ivun-doh I luv am wel-wel).

¹³ If to sey yu dey here, I for wont mak e help mi as I stil dey prizin bikos of di gospol wok.

¹⁴ Bot I nor won du enitin wey yu nor go laik, so dat di gud wey yu du, nor go bi by fos, bot e go kom from yor maind.

¹⁵ May bi na bikos of dis mak am nor dey wit yu since, bot naw, e go dey wit yu foreva.

¹⁶ Nor bi as slave, bot as broda wey wi luv, bikos e don big pas slave. E don bikom awa broda naw, bikos God don shange am.

¹⁷ So, if yu si mi as yor broda and patina, mak yu asept am as yu go tak asept mi.

¹⁸ If e tif or hol yu enitin bifor, mak yu tel mi and I go pay.

¹⁹ Na mi Pol tak my hand rite dis leta sey, I go pay bak, bot I fit stil sey, yu yorsef dey hol mi.

²⁰ So my broda, mak yu du dis tin for mi bikos of Kraist, so dat bele go swit mi.

²¹ I dey sure sey yu go du wetin I ask yu, so I dey rite giv yu, bikos I no sey yu go du pas wetin I ask.

²² So, mak yu priper wer I go stay, bikos I no sey yor prayas go mak dem fri mi kom mit yu soon.

²³ Epafras, wey dey prizin wit mi, bikos of Jisos Kraist, dey grit yu.

²⁴ Mark, Aristakus, Demas and Luke, wey bi my co-wokas, dey grit yu tu.

²⁵ Mak awa Oga Jisos Kraist grace dey wit yor spirit.