Mark 9

¹ Jisos kon tel dem, "I tel una tru wod, som pipol dey here wey nor go die ontil dem don si God Kindom and en pawa."

² Afta sis days, Jisos, Pita, James and Jon kon go won high mountin. E kon shange for dia front,

³ en klot kon dey shine wel-wel and e white pas haw eni dry-klina go fit wosh am.

⁴ Den Elija and Mosis kon apier for dia front dey tok wit Jisos.

⁵ So, Pita tel Jisos, "Tisha, e gud mak wi stay here. Mak wi build tiri canopi, won for yu, won for Mosis and won for Elija."

⁶ (Dem dey fear and dem nor no wetin to tok.)

⁷ Den, kloud kon kova dem and won vois kon tok from di kloud sey, "Dis na My onli pikin wey I luv. Mak una listin to am!"

⁸ Wen dem luk roun, dem nor si enibodi esept Jisos.

⁹ As dem dey kom dan from di mountin, Jisos kon tel dem mak dem nor tel enibodi wetin dem si, ontil Man Pikin go don wak-up from deat.

¹⁰ Den dem kon dey tok wit ish oda abaut wetin dis "Wak-up from deat" min.

¹¹ Dem kon ask Jisos, "Wetin mak di law tishas dey sey Elija go first kom?"

¹² Jisos ansa dem, "Tru-tru, Elija go first kom, mak e for priper evritin. Naim mak dem rite for God wod sey, 'Man Pikin must sofa meni tins and dem must hate am?'

¹³ "Bot I dey tel una naw sey, Elija don kom tru-tru and dem don du-am wetin dem laik, jos as God tok for en wod.

¹⁴ Wen Jisos, Pita, James and Jon kom mit di oda disaipols, dem si meni pipol and di law tishas gada, dey argue wit dem.

¹⁵ Wen di pipol si Jisos, dem sopraiz kon run kwik-kwik go grit am.

¹⁶ Jisos ask dem, "Wetin una dey argue abaut?"

¹⁷ Won pesin among di pipol kon ansa, "Tisha, I bring my pikin wey get dimon wey dey mak am nor fit tok, kom mit yu.

¹⁸ "Enitaim di spirit seize am, e go trow am dan and e go dey bring foam from en mout, dey grind en tit and en bodi go kon strate. I tel yor disaipols mak dem driv di dimon komot, bot dem nor fit."

¹⁹ Jisos kon ask en disaipols, "Una wey nor biliv! Haw long I go stay wit una? Haw long I go dey bear wit una? Mak una bring di boy kom mit mi."

²⁰ So, dem tak di boy go mit am. Wen di spirit si Jisos, e kwik-kwik trow di boy for groun kon mak am dey shake. Di boy fal for groun, dey rol and foam dey komot from en mout.

²¹ Jisos ask di boy papa, "Since wen dis tin don dey du-am?" Di papa kon ansa, "Na since e bi smol pikin.

²² "Di spirit dey always trow am insaid fire or wota mak e for die. Bot if yu go fit du enitin, mak yu sori for am and help us."

²³ Den Jisos ask am, "Yu min, 'If I fit?' Evritin dey posibol for di pesin wey biliv."

²⁴ Kwik-kwik di boy papa kon shaut, "I biliv o-o! Help mi mak I biliv more-more!"

²⁵ Wen Jisos si sey pipol dey gada, e kon tel di evil spirit, "Yu deaf and dumb spirit, I komand mak yu kom out from di boy and nor enta en bodi again."

²⁶ Di dimon shaut, shake di boy wel-wel kon komot from en bodi. Di boy slip for groun sotey meni pipol kon dey sey, "E don die!"

²⁷ Bot Jisos hol di boy hand smol-smol, kari am up and di boy kon stand-up.

²⁸ Wen e enta haus, en disaipols kon ask am, "Why wi nor fit driv di dimon komot?"

²⁹ Jisos ansa dem, "Na onli wit praya and fastin dis kaind won dey tak komot."

³⁰ Jisos and en disaipols kon komot from der pas Galili. Bot Jisos nor wont mak enibodi no,

³¹ bikos e dey tish and tel en disaipols sey, "Dem go sel Man Pikin giv humanbin. Dem go kil-am and afta tiri days, e go wak-up again."

³² Bot di disaipols nor undastand wetin Jisos tok and fear nor let dem ask am wetin e min.

³³ Dem kon rish Kapanum. So, wen Jisos don enta haus, e kon ask en disaipols, "Wetin una dey tok for road?"

³⁴ Bot dem nor ansa, bikos wen dem dey kom for road, na hu big pas among dem, dem dey argue abaut.

³⁵ Afta Jisos sidan, e kol en twef disaipols kon tel dem, "If enibodi among una won bi first, e go bi di last and e go bi evribodi savant."

³⁶ E kon kol won smol pikin stand for dia front. Den e hol di pikin hand, kon sey,

³⁷ "Enibodi wey welkom won of dis smol pikin bikos of mi, na mi e welkom and enibodi wey welkom mi, nor bi mi alone e welkom, bot na my Papa wey send mi."

³⁸ Jon kon tel am, "Tisha, wi si won man wey yuz yor name dey driv dimon komot from insaid pipol bodi and wi kon trai to stop am, bikos e nor dey folo us waka."

³⁹ Bot Jisos ansa dem, "Mak una nor stop am, bikos nobodi wey yuz my name du mirakol go fit tok bad tin abaut mi.

⁴⁰ "Bikos enibodi wey nor dey against us, dey for awa side.

⁴¹ "I tel una tru wod, enibodi wey giv yu cup of wota bikos yu dey folo mi, nor go eva luz en riwod.

⁴² "If enibodi mak won of dis smol pikin wey biliv mi komit sin, e go beta mak dem tie big stone for en neck kon trow am insaid riva.

⁴³ "If yor hand go mak yu sin, mak yu kut am komot! E beta mak yu enta insaid God Kindom wit won hand, dan to get tu hand kon enta hell fire wey nor go eva kwensh,

⁴⁴ di place wey get worm wey nor dey die and di fire nor dey kwensh.

⁴⁵ "If yor leg go mak yu sin, mak yu kut am komot. E beta mak yu enta God Kindom wit won leg, dan to get tu leg kon enta hell fire wey nor dey eva kwensh,

⁴⁶ di place wey get worm wey nor dey die and di fire nor dey kwensh.

⁴⁷ "If yor eye go mak yu sin, mak yu pul am komot! E beta mak yu enta God Kindom wit won eye, dan to get tu eye kon enta hell fire wey nor dey eva kwensh,

⁴⁸ di place wey get worm wey nor dey die and di fire nor dey kwensh.

⁴⁹ "God go trai evribodi wit fire.

⁵⁰ "Salt gud, bot if e nor get taste again, haw pesin go fit tak mak am swit? Mak una get salt insaid una and mak una dey liv for peace wit ish oda."