Job 6

¹ Job con answer say:

² I wish say dem fit measure my trouble and worry on top scale,

³ dem go weigh pass sand wey dey sea, so make my crazy word no surprise una.

⁴ Almighty God don shoot me with him arrow, and the poison spread around my body. God don line up him terror against me.

⁵ Donkey wey dey chop grass dey okay with wetin him dey chop, and when cow dey chop hay e dey quiet.

⁶ But who fit chop food wey no get taste or salt? Which kind taste dey for the white part of egg?

⁷ I no get appetite for that kind food, and everything wey I dey chop dey make me sick.

⁸ Why God no go give me wetin I ask? Why him no go answer my prayer?

⁹ Make he just kill me!

¹⁰ If I know say him go do am, I for jump for joy, no matter how great my pain go be. I know say God dey holy; I never go against wetin him command.

¹¹ Which kind strength I get to dey live? Why I dey alive when I no get hope?

¹² Na stone dem use make me? My body na bronze?

¹³ I no get any strength to save myself again; nowhere wey I fit turn to for help.

¹⁴ For trouble like this, I need friends wey dey loyal - whether I don reject God or not.

¹⁵ But una wey be my friend dey deceive me like stream wey dey dry when rain no come.

¹⁶ Na snow and ice dey block the stream,

¹⁷ But dem dey disappear when heat come, and the streamside go dey dry and empty.

¹⁸ Caravan dey lost as e dey look for water; dem dey wander and die for desert.

¹⁹ Caravan from Sheba and Tema dey search,

²⁰ But their hope dey die beside stream wey don dry.

²¹ Una be like those streams to me, una dey see my fate and fear dey make una draw back.

²² Shey I ask una make una give me gift or bribe person for me

²³ Or make una save me from some enemy?

²⁴ All right, make una teach me; make una tell me my fault. I go dey quiet and I go listen to una.

²⁵ Honest word dey win person heart, but una dey talk nonsense.

²⁶ Shey una dey try condemn me? Shey una go continue dey talk una words wey dey tire person?

²⁷ Shey una be the kind people wey go gamble for orphans and even plan evil for una owns friends?

²⁸ Look me for face, and see say I no dey lie.

²⁹ Una don go too far. Make una stop to dey do bad-belle. No condemn me. I dey right.

³⁰ But una think say I dey lie - una think say I no know wetin dey right from wrong.