Job 3

¹ Finally Job stop to dey silent and he curse the day wey den born am.

² O God, put curse on the day wey dem born me;

³ put curse on the night wey dem born me!

⁴ God, make you turn that day to darkness. Make I no remember that day again; make light no shine on am again.

⁵ Make am a day wey darkness dey thick; cover am with cloud, and mark out the sun.

⁶ Mark that night commot from the year, make e no dey for calendar again;

⁷ Make that night no dey produce anything again, make e be night wey no get joy.

⁸ Tell the wizard make them curse that day, those wey fit control Leviathan.

⁹ Make the morning star no shine; make that night no get hope for morning.

¹⁰ I even wish say e no allow make dem born me, and keep me make I no see all this trouble.

¹¹ I wish say I don die for my mama belle or die the time wey dem born me.

¹² Why my mama hold me for her knee? Why she feed me with her breast?

¹³ If to say I don die, I go dey rest now,

¹⁴ I for dey sleep like kings and rulers wey rebuild old palace.

¹⁵ Then I go dey sleep like prince wey full him house with gold and silver,

¹⁶ Or dey sleep like new born pikin wey dem born dead.

¹⁷ For inside grave wicked people dey stop their evil, and workers wey don tire dey find rest at last.

¹⁸ Even prisoner dey enjoy peace, dem dey free from shout and terrible command.

¹⁹ Everybody dey there, the popular people and the people wey no popular, and slave dey free at last.

²⁰ Why you allow people dey live inside pain? Why you give light to those wey dey sad?

²¹ Dem wait for death, but e no come; dem prefer grave pass any treasure.

²² Dem no happy till dem die and when dem bury dem;

²³ God hide their future and trim them for every side.

²⁴ Instead make I dey chop, I dey mourn, and I no fit stop to dey complain.

²⁵ Everything wey I fear dey come true.

²⁶ I no get peace, no rest and my trouble no dey end.