Job 19

¹ Job con answer them say:

² Why una just dey suffer me with word?

³ Every time una dey insult me and no dey show shame the way una dey abuse me.

⁴ Even if I don do anything wrong, how that one take wound una?

⁵ Una think say una better pass me, and talk of my trouble as proof say I dey guilty.

⁶ Una no fit see say na God don do this? He don set trap make e catch me.

⁷ I dey use violence protest against him, but him no dey listen; nobody hear me as I dey cry for justice.

⁸ God don block way, I no fit enter; he don hide my way for darkness.

⁹ He don take all my wealth and he don spoil my name.

¹⁰ He abuse me for every side. He uproot my hope and leave me to dry and die.

¹¹ God dey vex and he get temper against me; he treat me like him worst enemy.

¹² He send him army make dem attack me, dem dig pit and block my tent.

¹³ God don make my family forget me; I be stranger to those wey know me;

¹⁴ my family and my friends don leave me.

¹⁵ Those wey be guest for my house don forget me; I be stranger to those wey know me; my servant dey treat me like stranger and foreigner.

¹⁶ When I call one servant, he no dey answer- even when I beg am to help me.

¹⁷ My wife no like as my mouth dey smell, and my own brother no even wan come near me.

¹⁸ Children no like me and dem dey laugh when dem see me.

¹⁹ My close friend dey look me with disgust; those wey I love most don turn against me.

²⁰ My skin dey hang on top my bone, I don lean finish; na small time remain for my life.

²¹ Una be my friend! Make una pity me! Hand of God don strike me down.

²² Why una go suffer me the way God dey do? Una never suffer me reach?

²³ How I wish say person fit remember wetin I talk and record them inside book;

²⁴ Or make dem carve my word on top stone with chisel and write them so that e go last forever.

²⁵ But I know say person dey for heaven wey go come defend me at last.

²⁶ Even after disease don chop my skin, as e still dey my body I go see God.

²⁷ I go see am with my own eye, and him no go be stranger. My courage fail because una talk say,

²⁸ How we fit suffer am? Una look for excuse to use attack me.

²⁹ But now, make una fear the sword - the sword wey dey bring God anger on top sin, so that una go know say person dey wey dey judge.