Job 18

¹ Bildad from Shuah con answer say:

² Job, people like you no fit keep quiet? Try get sense nah; allow us make we say something.

³ Wetin make you think say we dey stupid like sheep?

⁴ You just dey use vex wound yourself. Shey you go leave earth because you dey vex? Shey God go move mountain make he satisfy you?

⁵ The light of the wicked go still off; the flame no go burn again.

⁶ The lamp wey dey their tent go off.

⁷ Their step been dey strong, but e don weak now - dem go fall to their own advice.

⁸ Dem waka enter net, and e catch them for leg;

⁹ a trap catch them for their feet and e hold them.

¹⁰ trap dey hide for ground; dem don set trap for their way.

¹¹ Na terror dey wait all around; e dey follow them for every step.

¹² Dem been dey rich before, but now hunger dey wire them; disaster dey stand and wait for their side.

¹³ Terrible disease dey spread over their body and make their hand and leg rotten.

¹⁴ Dem don run commot from the tent wey dem dey live safe, and dem go meet death, wey be king of terror.

¹⁵ Now anybody fit live for their tent, after dem purify am with sulfur!

¹⁶ Their root and branches don die and dry.

¹⁷ Na for home and abroad their fame dey end; nobody dey remember them again.

¹⁸ Dem go drive them commot from the land of the living, and drive them from light to darkness.

¹⁹ Dem no get any descendant, no children.

²⁰ From east go west, everybody wey dey hear wetin happen to them dey shake with fear.

²¹ Na wetin go happen to evil people be that, those wey no care for God.