Jeremiah 30

¹ The LORD, God of Israel,

² Tell me say: “Write down everything wey I don tell you for book,

³ Because the time dey come when I go bring back my people, Israel and Judah. I go bring them back to the land wey I give their ancestors and dem go own am again. I, the LORD, don talk.”

⁴ God tell people of Israel and Judah say:

⁵ “I hear cry of terror, cry of fear and not of peace.

⁶ Now make una stop and think! Shey man fit born pikin? Why I con dey see every man dey put hand for him belle like woman wey dey labour? Why everybody dey look sad?

⁷ A terrible day dey come; no other day go be like am- time of pain for my people, but dem go survive.”

⁸ The LORD Almighty talk say: “When that day show, I go break the yoke wey dey round their neck and I go remove their chain, and dem no go be slave of foreigners again.

⁹ Instead, dem go serve me, the LORD their God, and descendant of David, wey I go put for throne as king.

¹⁰ “My people, make una no fear; people of Israel, make una no fear. I go rescue una from that far land, from the place wey una be prisoner. Una go come back home and go live in peace; una go dey safe and no one go make una fear.

¹¹ I go come to una and save una. I go destroy all nations where I don scater una go, but I no go destroy una. I no go allow una go unpunished; but when I punish una, I go dey good. I, the LORD, don talk.”

¹² God tell him people say, “Una wounds no get cure, una injury no fit heal.

¹³ No one to take care of una, una wound no get treatment, una healing no get hope.

¹⁴ All una lovers don forget una; dem no care about una again. I don attack una like enemy, una punishment don dey terrible because una sins plenty and una wickedness great.

¹⁵ Make una no complain again about una injury, cure no dey for una. Na me punish una like this because una sin too plenty and una wickedness great.

¹⁶ But now, I go destroy those wey destroy una, and I go take una enemy away as prisoners, I go oppress those wey oppress una, and I go rob those wey rob una.

¹⁷ I go make una well again; I go heal una wound, though una enemy talk say, ‘Zion na rejected place; nobody dey care about her.’ I, the LORD, don talk.”

¹⁸ God say, “I go bring my people back to their land and I go have mercy on top every family; I go rebuild Jerusalem and I go rebuild him palace.

¹⁹ People wey dey live for there go sing praise, dem go shout for joy. Dem go increase in number by my blessing; my blessings go bring honour to them.

²⁰ I go restore the nation ancient power and I go make am strong again; I go punish those wey oppress them.

²¹ Their rulers go come from their own nation, their prince go come from their own people.

²² He go come meet me when I invite him, because who fit try come to me if I no invite am? Dem go be my people and I go be their God. I, the LORD, don talk.”

²³ God anger na storm, a terrible wind wey go destroy the head of the wicked.

²⁴ E no go end until he don do all wey he wan do. In days to come him people go understand this clearly.