Genesis 43

¹ The hunger come dey worse for Canaan,

² after Jacob family don finish the corn wey dem bring from Egypt. Jacob tell him sons say make una come go buy food for us.

³ Judah come say the man don warn us say dem no go allow us if we no bring our brother with us.

⁴ If you go send our brother with us, we fit go buy food for you

⁵ but if you no go allow am, we no go fit go, because the man don warn us say if we no bring our brother, him no go allow us.

⁶ Jacob come say, "Why una cause trouble for me because you tell the man say you get another brother"?

⁷ Dem come answer, "the man continue to dey ask about us and our family. Una father still dey alive? Shey una get another brother? We no get choice than to answer him questions. How we go know say, him go tell us say make we bring our brother with us"?

⁸ Judah come tell him father say, send the boy with me and we go leave immediately. Then none of us go starve to death

⁹ and I go swear with my own life and you fit hold me responsible for him. If I no bring him back to you safe and sound, I go bear the blame.

¹⁰ If to say we no wait too long, we for don go there and come back twice by now.

¹¹ Their father come tell them say, "if na so e go be then you go take the best product of the land for your back as gift for the governor. A little resin, a little honey, spices, malt and almond.

¹² Take double money because una go return the money wey dem put on top una sacks, maybe na mistake,

¹³ take your brother and go at once.

¹⁴ Almighty God go make the man get pity on una so that e go give Benjamin and una other brother back to una. As for me, if na to lose my children, make I lose them.

¹⁵ Naso the brothers come take the gifts and double money and dem begin dey go Egypt with Benjamin. Dem come present themselves to Joseph.

¹⁶ When Joseph see Benjamin with them, he tell the servant wey dey in charge of the house, "take these men to my house, dem go eat with me for noon. Go kill animal and prepare am"'.

¹⁷ The servant come do wetin he don command him to do and he take the brothers to Joseph house.

¹⁸ As dem take them to the house, dem begin dey fear and think say, "them bring us come here because of the money wey them return for our sacks the first time, them go suddenly attack us, take our donkeys and turn us to slaves.

¹⁹ So, for the door of the house, dem tell the servants wey dey in charge,

²⁰ I beg sir we don come here once to buy food.

²¹ When we set up camp on our way home, we come open our sacks, each of us come find money for top of our sack.

²² We don bring am back to you, we don also bring more money to buy food. We no know who put our money back to our sacks.

²³ The servant come tell them say, "no worry, make una no fear, una God the God of your father for don put the money for una sacks, I don receive una payment". He come bring Simeon back to them.

²⁴ The servant come take the brothers enter the house. He give them water so that dem fit wash their feet and he feed their donkeys.

²⁵ Dem come prepare their gifts so that dem fit present am to Joseph when he arrive for noon because he don tell them say dem go follow him eat.

²⁶ When Joseph reach home, dem take the gifts enter the house to him and dem bow down to the ground before him.

²⁷ He come ask them about their health and he say, "una tell me about una old father. How him dey? Shey him still dey alive and ok"?

²⁸ Dem answer, "Your humble servant, our father still dey alive and well". Dem come kneel and bow down before him.

²⁹ When Joseph see him brother Benjamin, he say, "na this be your youngest brother wey you tell me about? God bless you my son."

³⁰ Joseph come leave suddenly because him heart dey full of tender feelings for him brother. He don almost break down, naso he go to him room and he cry.

³¹ After he don wash him face, he come out and he begin dey control himself. He come order say make dem serve food.

³² Dem serve Joseph for one table and him brothers for another table. Dem serve the Egyptians wey dey eat for their separate because dem consider am say e no dey proper for Hebrews to dey eat with them.

³³ The brothers don sit for table and dem dey face Joseph for the order of their age, from the eldest to the youngest. When dem see how them don sit, dem look at one another with surprise.

³⁴ Them come serve them food from Joseph table, them come serve Benjamin five time more than the rest of them. Naso them eat and drink until dem don bellefull.