Zabura 93

¹ Ubangiji sarki ne! Yana saye da ɗaukaka, suturarsa ƙarfi ne. Hakika duniya ta kahu sosai a inda take, Ba kuwa za ta jijjigu ba.

² Kursiyinka, ya Ubangiji, ya kahu tun daga farko, Kana nan tun fil azal.

³ Ya Ubangiji, zurfafan teku suna ta da muryarsu, Suna ta da muryarsu da ruri.

⁴ Ubangiji yana mulki cikin Sama, Mulkinsa mafifici ne, Fiye da rurin teku, Fiye da ikon raƙuman ruwan teku.

⁵ Dokokinka dawwamammu ne, ya Ubangiji, Haikalinka kuwa tsattsarka ne ƙwarai, Har abada abadin.