Zabura 26

¹ Ka hurta rashin laifina, ya Ubangiji, Gama na yi abin da suke daidai, Na dogara gare ka gaba ɗaya.

² Ka jarraba ni ka auna ni, ya Ubangiji, Ka gwada muradina da tunanina.

³ Madawwamiyar ƙaunarka tana bi da ni, Amincinka yake yi mini jagora kullayaumin.

⁴ Ba na tarayya da mutanen banza, Ba abin da ya gama ni da masu riya.

⁵ Ina ƙin tarayya da masu mugunta, Nakan kauce wa mugaye.

⁶ Ya Ubangiji, na wanke hannuwana Don in nuna ba ni da laifi, Da ibada nakan taka, ina kewaya bagadenka.

⁷ Na raira waƙar godiya, Na faɗi dukan ayyukanka masu banmamaki.

⁸ Ya Ubangiji, ina ƙaunar Haikali inda zatinka yake, Inda ɗaukakarka yake zaune.

⁹ Kada ka hallaka ni tare da masu zunubi, Ka cece ni daga ƙaddarar masu kisankai,

¹⁰ Mutanen da suke aikata mugunta a dukan lokaci, A koyaushe suna shirye don su ba da rashawa.

¹¹ Amma ni, ina yin abin da yake daidai, Ka yi mini jinƙai ka fanshe ni!

¹² Na kuɓuta daga dukan hatsarori, A taron sujada na yabi Ubangiji!