Psalms 24

¹ Na God get the world and everything wey dey inside am; na him get the earth and everything wey dey live on top am.

² He build am on top water wey deep wey dey under the earth and put the foundation for inside deep ocean.

³ Who get right to go to the hill of the LORD? Who fit enter him holy Temple?

⁴ Those wey dey pure in act and get pure thinking, wey no dey worship idols or no dey use lie make promise.

⁵ God go bless them and save them; God go make them innocent.

⁶ That na the kind people wey dey come to God, wey dey come inside the presence of the God of Jacob

⁷ Make una open the gate wide, and the ancient door, make the King of glory enter.

⁸ Who be this king of glory? Na him be the LORD, wey dey strong and mighty. The LORD, wey dey get victory in battle.

⁹ Make una open the gate, open the ancient door and the King of glory go enter.

¹⁰ Who be this king of glory? The LORD wey get all power - na Him be the King of glory.