Numbers 13

¹ God tell Moses say,

² “Choose one of the leaders from each of twelve tribes and send them as spies make dem go check the land of Canaan, wey I dey give to the Israelites.”

3-

¹⁵ Naso Moses obey and send the leaders when dem dey Paran desert. Na their name follow so: from tribe of Reuben – Shammua, son of Zaccur; from tribe of Simeon – Shaphat, son of Hori; from tribe of Judah – Caleb, son of Jephunneh; from tribe of Issachar – Iga, son of Joseph; from tribe of Ephraim – Hoshea, son of Nun; from tribe of Benjamin – Palti, son of Raphu; from tribe of Zebulun – Gaddiel, son of Sodi; from tribe of Manasseh – Gaddi, son of Susi; from tribe of Dan – Ammiel, son of Gemalli; from tribe of Asher – Sethur, son of Michael; from tribe of Naphtali – Nahbi, son of Vophsi; from tribe of Gad – Geuel, son of Machi.

¹⁶ Na these be the spies wey Moses send to go check the land. He change Hoshea name to Joshua.

¹⁷ When Moses send them out, he tell them say, “Go north from here enter southern part of Canaan land and then to hill country.

¹⁸ Find out the kind country wey e be, how many people dey live there, and how strong dem be.

¹⁹ Find out whether the land good or bad, and whether the people dey live for open town or na wall city.

²⁰ Find out if the soil dey good for planting, and if dem get trees for the land. And dey sure say una bring some of the fruit wey dey grow there.” (Na the season when grapes don begin to dey ripe.)

²¹ Naso the men go north and check the land through desert of Zin for south to Rehob, near Hamath Pass for north.

²² Dem first enter the southern part of the land and reach Hebron, where clans of Ahiman, Sheshai, and Talmai, the descendants of giant people wey dem dey call Anakim, don live. (Dem build Hebron city seven years before Zoan for Egypt)

²³ Dem reach Valley of Eshcol, and for there dem cut a branch wey get bunch of grape on am. The grape heavy so tail, na two men use pole carry am. Dem also bring some pomegranates and figs.

²⁴ (Dem name the place Valley of Eshcol because of bunch of grape Israelites cut off for there.)

²⁵ After dem don check the land for forty days, the spies go back

²⁶ to Moses, Aaron, and the community of Israel for Kadesh in Paran desert. Dem report to them wetin dem don see and show them the fruit wey dem bring.

²⁷ Dem tell Moses say, “We check the land and we see say plenty good things dey for the land; na some of the fruit for the land be this.

²⁸ But the people wey dey live for there dey powerful, and their city dey very large with strong defense. Anakite giants even dey there.

²⁹ Amalekites dey live for southern part of the land; Hittites, Jebusites, and Amorites dey live for the hill country; and Canaanites dey live near Mediterranean Sea and along River Jordan.”

³⁰ Caleb tell the people wey dey complain against Moses say make dem keep quiet, say, “Make we attack now and take the land; we dey strong enough to take am.”

³¹ But the men wey don go with Caleb say, “No, we no strong enough to attack them; the people wey dey there dey powerful pass us.”

³² Naso dem begin dey spread rumor among Israelites about the land dem don go check. Dem say, “The land no dey produce enough to feed the people wey dey live for there. Everyone wey we see for there dey very tall,

³³ and we even see giants for there, the descendants of Anak. We feel like say we small like grasshoppers, and e be like say na so dem dey see us.”