Nigerian Pidgin Bible
Leviticus 7
1 Na the rule for repayment offering, wey dey very holy be this.
2 Make them kill the animal for this offering for north side of altar, where dem dey kill animal for burnt offering, and make dem throw the animal blood for four sides of the altar.
3 Make dem remove all the fat and offer am on top altar: the fat tail, the fat wey dey cover the internal organ,
4 the kidney and fat wey dey on them, and the best part of the liver.
5 The priest go burn all the fat on top altar as food offering to God. Na repayment offering.
6 Any male of the priest family fit eat am, but make dem eat am for holy place, because e dey very holy.
7 E get one rule wey sin offering and repayment offering get in common: na the priest wey offer the sacrifice get the meat.
8 Na the priest wey offer burnt offering sacrifice get skin of animal wey dem use.
9 Na the priest wey offer grain offering sacrifice to God get all grain offering wey dem don bake inside oven or for pan or for griddle.
10 But all grain offering wey dem never cook, whether dem mix am with oil or e dey dry, na Aaronite priest get am, and make dem share am equally for all of them.
11 Na the rules for fellowship offering wey dem offer to God follow so.
12 If a man make this offering as thanksgiving offering to God, he go present offering of thick bread wey no get yeast together with the animal wey he wan sacrifice: e fit be thick loaves wey dem make with flour and olive oil mix or biscuit wey dem brush with olive oil or cake wey dem make with flour and olive oil mix.
13 And he go offer bread wey dem bake with yeast join am.
14 He go present one part of each bread as special contribution to God, na the priest wey take blood of animal and throw am for altar get am.
15 Make dem eat flesh of animal wey dem use the day dem sacrifice am; una no fit leave any of am till next morning.
16 If a man bring fellowship offering to come pay for vow or as him own freewill offering, una no need to eat all of am the day he come offer am, una still fit eat the remaining the next day.
17 Make una burn any meat wey remain for third day.
18 If una eat the one wey remain for third day, God no go accept the man offering. The offering no go count to him credit but e go be unclean, and anyone wey eat am go suffer the punishment.
19 If the meat touch anything wey no dey clean, make dem no eat am, but make dem burn am. Anyone wey dey clean fit eat the meat,
20 but if anyone wey no dey clean eat am, he no go be one of God people again.
21 Also, if anyone eat the meat of this offering after he don touch anything wey no dey clean, whether from man or animal, he no be one of God people again.
22 God give Moses the rule wey follow
23 for people of Israel. Make una no eat fat of cattle, sheep, or goats.
24 Make una no eat fat of animal wey die natural death or wey wild animal kill, but una fit use am for other thing.
25 Anyone wey eat fat of animal wey dem fit offer as food offering to God no go be one of God people again.
26 For anywhere wey Israelites live, make una no use blood of birds and animals for food.
27 Anyone wey break this law no go be one of God people again.
28 God give Moses the rule wey follow
29 for people of Israel. Anyone wey offer fellowship offering must bring part of am as special gift to God,
30 make he bring am with him own as food offering. He go bring the animal fat with the breast and present am as special gift to God.
31 The priest go burn the fat on top altar, but the breast go be priest own.
32 The right back leg of the animal go be special contribution
33 to the priest wey offer blood and fat of the fellowship offering.
34 The animal breast na special gift, and the back leg na special contribution wey God don take from people of Israel and give am to the priests. Na this one be wetin people of Israel must dey give to priests for time to come.
35 Na part of the food wey dem offer to God wey dem give Aaron and him sons for the day dem ordain them as priests.
36 For that day God command people of Israel say make dem give this part of the offering to the priests. Na rule wey people of Israel must dey obey for all time to come.
37 Na rule for burnt offering, grain offering, sin offering, repayment offering, ordination offering, and fellowship offering.
38 Na for there on top Mount Sinai for desert, God give the commands to Moses on the day wey he tell people of Israel say make dem make their offerings.