Nigerian Pidgin Bible
Job 9
1 Job con answer say:
2 Yes, I don hear all that one before. But how human being fit win case against God?
3 How anybody fit argue with him? He fit ask thousand question wey nobody fit answer.
4 God dey wise and powerful; nobody fit stand against him.
5 He dey move mountain without warning and he dey use vex destroy them.
6 God dey send earthquake wey dey shake ground; he dey rock the pillar wey dey support earth.
7 He fit stop sun to dey rise, and stop stars make dem no dey shine for night.
8 Nobody help God spread the heaven or match the sea monster for back
9 Na God hang star for sky - the Great Bear, Orion, the Pleiades, and the star of the south.
10 We no fit understand the great thing him dey do, and him miracle no get end.
11 God dey pass by, but I no fit see him.
12 Him dey take wetin he want, and nobody fit stop him; nobody fit try ask him say, Wetin you dey do?
13 God no dey hold him anger. Even those wey dey help Rahab dey fear him.
14 So how I go fit find word to take answer God?
15 Though, I dey innocent, all wey I fit do na to beg for mercy from God wey be my judge.
16 Yet even if he allow me talk, I no believe say him go hear me.
17 He dey send storm make e beat me and wound me without any reason at all.
18 Him no go allow me catch my breath; he don full my life with bitterness.
19 Make I try force? Make I try force on God? Make I carry him go court? Anyone dey wey fit make him go?
20 I dey innocent and faithful, but my word dey sound sorry, and everything wey I talk be like say e dey attack me.
21 I dey innocent, but I no care again. I don tire to dey live. Nothing dey matter;
22 Innocent or guilty, God go destroy us.
23 When innocent person die, God dey laugh.
24 God don give the world to wicked people. Him make all judges blind. And if God no do am, who do am?
25 My days day pass by, none of dem dey good.
26 My life fast like boat, e dey fast like eagle wey dey dive down on rabbit.
27 If I dey smile to try forget my pain, all my suffer dey come back come disturb me;
28 I know say God dey hold me guilty.
29 Since him dey hold me guilty, why I go bother?
30 No soap fit wash my sin away,
31 God throw me inside pit wey dirty, even my cloth dey shame for me.
32 If God na man, I fit answer him; we fit go court make we go settle our beef.
33 But nobody dey wey go stand between us - nobody dey to judge me and God.
34 God, stop to dey punish me; keep your terror away;
35 I no dey fear, I go talk because I know my own heart.