Isaiah 7

¹ When King Ahaz, son of Jotham and grandson of Uzziah, rule Judah, war happen. Rezin, king of Syria, and Pekah son of Remaliah, king of Israel, attack Jerusalem, but dem no fit capture am.

² When the word reach king of Judah say armies of Syria don already dey territory of Israel, fear catch him and him people fear so tay dem dey shake like trees wey wind dey shake.

³ God tell Isaiah say, “Take your son Shear Jashub, go meet King Ahaz. You go see him for road where the cloth makers dey work, at the end of the channel wey dey bring water from the upper pool.

⁴ Tell him say make he dey at alert, make he dey calm, and make he no fear or worry. The anger of king Rezin and him Syria and king Pekah no bad pass smoke wey dey come from two burning stick.

⁵ Syria, together with Israel and hin king, don make plan.

⁶ Dem wan capture Judah, dem wan scare the people make them join their side, and then con put son of Tabeel for throne.

⁷ “But I, the LORD, declare say this no go happen.

⁸ Why? Because Syria no strong pass Damascus, hin capital city, and Damascus strong pass king Rezin. As for Israel, within 65years e go shatter too much so tey e no go fit survive as a nation.

⁹ Israel no strong pass Samaria, hin capital city, and Samaria no strong pass king Pekah. “If your faith no dey endure, you no go fit endure.”

¹⁰ God send another message to Ahaz say:

¹¹ “Ask the LORD your God make he give you sign. E fit be from deep in the world of the dead or from high up in heaven.”

¹² Ahaz answer say, “I no go ask for a sign. I no go test the LORD.”

¹³ Isaiah reply say, “Make una listen now, descendant of King David. Shey e never do una as una dey test the patience of human - shey una go test patience of God too?

¹⁴ then, God go give una sign by himself: a young woman wey don get bellen go born son pikin and him name go be ‘immanuel.’

¹⁵ By the time wey he don old to make him own decision, people go dey drink milk and dey chop honey.

¹⁶ Even before that time show, the land of those two kings wey scare una go empty.

¹⁷ The LORD go bring day of trouble on top you , una people and the royal family wey worse pass anyone wey don happen since king of Israel don separate from Judah- he go bring the king of Assyria.

¹⁸ “When that time show, God go whistle as signal for Egyptian say make them come like flies from far branches of Nile, and for Assyrians make them come from their land like bees.

¹⁹ Dem go plenty for rugged valley and for cave of rock and dem go cover every thorn bush and every grassland.

²⁰ ”When that time come, God go hire barber from Euphrates- the emperor of Assyria!- and he go shave una bears commot, and the hair wey dey una head and una body.

²¹ ”When that time come, even if na only one young cow and two goat a farmer fit save,

²² Dem go give plenty milk that he go get everything wey he need. Yes, the few wey survive for the land go get milk and honey wey dem go chop.

²³ “When that time come, thorn bushes and wild rose go cover the fine vineyard, each wey get thousand vines and each wey worth thousand pieces of silver.

²⁴ People go dey hunt for there with bow and arrow. Yes, wild roses and thorn bushes go full the whole country.

²⁵ Thorns go grow for all hills where crop dey grow so tey no one go fit go there. E go be place where cattle and sheep dey feed.”