Nigerian Pidgin Bible
Genesis 8
1 God come remember Noah and all animal wey dey inside boat with him, He come send wind to blow over earth and flood water begin dey go down.
2 Underground water stop to dey flow and rain stop to dey fall from sky.
3 Naso flood water begin dey go down gradually after 150 days.
4 Na exactly five months from when flood start, the boat land on top Ararat mountain.
5 Two and half months later, as the water dey go down, other mountains come dey show.
6 After another forty days, Noah come open window
7 and send one Raven bird out, the raven no come back but e dey fly around until the water dry.
8 Noah come send dove to see if water don go down, and if dry ground don show.
9 But the dove no fit land anywhere because water stil cover ground. Naso dove come back and Noah take am inside.
10 After seven days, Noah send dove again.
11 This time, dove return for evening with fresh leaf for mouth. Noah come know say flood water don almost dry.
12 Him wait for seven days and send dove again, this time, dove no come back. Noah done become 601 years old for first day of new year, ten and half month after flood begin, flood water don almost dry finish. Noah come open back of boat and see say ground don dey dry.
14 After two months, land come finally dry.
15 God con tell Noah say,
16 "Go out of boat with your wife, your sons and their wives.
17 Release all animals so that dem fit start to born And multiply over the earth.
18 Naso Noah leave boat with him wife, him sons and their wives.
19 All large and small animals with birds come leave boat pair by pair.
20 Noah come build alter for God and him make burnt offering with animals wey God don approve for sacrifice.
21 God come like the aroma of the sacrifice and He tell himself say, I no go ever curse ground because of human again. Eventhou everything wey them dey think from childhood na evil, I no go destroy all living things again.
22 As long as earth dey, planting and harvesting time go dey, cold and heat, summer and winter, day and night go always dey.