Genesis 41

¹ After two years don pass Pharaoh come dream say he dey stand for side of River Nile,

² seven cows wey dey fat and straight come out from the river and them begin to dey feed on grass.

³ Then another seven cow come out, dem dey very thin and bony. Them come stand by the other cows wey dey the river,

⁴ the thin cows come eat all the fat cows.

⁵ The king come wake up, he fall asleep again and he get another dream. This time he see seven heads of corn wey dey big and e don ripe, dey grow for one stock.

⁶ Naso another seven heads of stock come appear, but this one dey thin and e be like say desert wind don blow them away.

⁷ The thin head of corn come swallow the full ones. Naso Pharaoh come wake up and he realize say na dream him dey dream.

⁸ He begin dey worry for morning, naso he send for all the magicians and wise men wey dey Egypt. He tell them about him dream and non of them fit explain the dream to him.

⁹ Naso the cup bearer come tell the king say "I suppose confess say I don do wrong.

¹⁰ You dey vex with me and chief baker and you come put us for prison wey dey the house of captain of guard.

¹¹ One night, each of us come dream and the dream get different meaning.

¹² One young Hebrew dey there with us, he be captain of guard slave, we tell him our dreams and he interpret them for us.

¹³ Everything come happen as he don tell us. You put me back for my position and you kill the baker".

¹⁴ Naso the king send for Joseph and dem bring him from prison. After he don shave and he don change him cloth, he come meet the king

¹⁵ and the king tell him say, "I don dream and nobody fit explain am, dem don tell me say you fit interpret dreams."

¹⁶ Joseph come answer, "Your majesty, I no fit but God go interpret am for us".

¹⁷ The king come say "I dream say I dey stand for side of Nile,

¹⁸ where seven cows wey dey fat and sleek come out of the river and them begin to dey feed on grass.

¹⁹ Another seven cows wey dey thin and bony come out. Na dem be the poorest cows wey I don see for Egypt.

²⁰ But the thin cows come eat the fat ones

²¹ but nobody go notice am because them look bad as dem be before. Naso I wake up.

²² I come get another dream again. I see seven corn head wey full and ripe and them dey grow for one stock.

²³ Then I come see another seven corn head wey dey thin like say desert wind don blow them.

²⁴ The thin corn head come swallow the full ones. I don tell the magicians about my dreams but non of them fit explain the dream to me."

²⁵ Joseph come tell the king say the two dreams get the same meaning. God don tell you wetin Him go do,

²⁶ seven fat cows na seven years and seven full corn heads na seven years too, dem get the same meaning.

²⁷ The seven thin cows wey come up later and the seven thin corn heads na seven years of hunger.

²⁸ Na the way I tell you, God don show you wetin him go do.

²⁹ seven years of plenty go dey for the land of Egypt,

³⁰ after that seven years of hunger go dey and you go forget all the years wey dey good because the hunger go spoil the country.

³¹ You go forget everything about the time of plenty because the hunger wey go follow am go dey terrible.

³² But the interpretation of your dream mean say, God don settle the matter and He don fix am and He go make am happen for nearest future.

³³ Now, you suppose choose somebody wey get wisdom and knowledge and put am in charge of the country.

³⁴ U go also appoint other officials and you go take fifth of the crops for the seven years of planting,

³⁵ you go order them to collect all the foods for good years wey dey come make dem give am to authority wey go store them for the city and protect am.

³⁶ The Food go dey for the country when the seven years of hunger come, this way, hunger no go kill people.

³⁷ Pharaoh and him officials come approve the plan

³⁸ and he tell them say you no go ever find a man wey good pass Joseph, the man wey get spirit of God inside am.

³⁹ Pharaoh come tell Joseph, "God don show you all this thing so e dey clear say you get greater wisdom and knowledge pass anybody wey dey here.

⁴⁰ I go put you in charge of my country and all my people go obey your order. Your command go second my own.

⁴¹ I dey make you governor over all Egypt".

⁴² The king come remove ring wey get royal seal from him finger and he put am for Joseph finger. He come put a fine linen robe on him, and he put a gold chain round him neck.

⁴³ He come give him the second royal chariot to dey ride and him guard of honor dey go ahead of him. Naso Joseph become governor over all Egypt.

⁴⁴ Pharaoh come tell him say na me be king, and nobody for Egypt go do anything without your permission.

⁴⁵ He come give Joseph Egyptian name ''Zaphenath Paneah'' and he give him a wife, Asenath, daughter of Potiphera the priest for the city of Eliocolis.

⁴⁶ Joseph na thirty years old when he begin dey serve king of Egypt. He come leave the palace and he begin dey travel all over the land.

⁴⁷ For the time of seven years of plenty, the land come produce abundant crops.

⁴⁸ Joseph come collect and store them for cities. For each city, he dey store the food for field wey dey around am.

⁴⁹ Crops come plenty and Joseph stop to dey measure am. E be like sand of the sea.

⁵⁰ Before year of hunger come, Joseph don get two sons by Asenath.

⁵¹ He say God don make me forget all my sufferings and all my father family, naso e name the first son Manasseh.

⁵² He come say again, "God don give me children for the land of my trouble", naso he name the second son Ephraim.

⁵³ Seven years of plenty wey Egypt don enjoy come finish as Joseph don talk am,

⁵⁴ hunger dey every other country but food dey for the whole of Egypt.

⁵⁵ When Egyptians begin to dey hungry, dem come start dey cry to king for food. Naso he order them make dem go meet Joseph and do wetin him tell them.

⁵⁶ The famine come begin dey grow worse and e dey spread over the whole country, Joseph come open all the store houses and begin to sell crops to the Egyptians.

⁵⁷ People dey come from all over the whole world to buy crops from Joseph because the hunger dey terrible everywhere.