Zabura 128

¹ Mai farin ciki ne wanda yake tsoron Ubangiji, Wanda yake zamansa bisa ga umarnansa!

² Za ka sami isasshen abin biyan bukatarka, Za ka yi farin ciki ka arzuta.

³ Matarka za ta zama kamar kurangar inabi Mai 'ya'ya a gidanka, 'Ya'yanka maza kuma kamar dashen zaitun Suna kewaye da teburinka.

⁴ Mutumin da yake yi wa Ubangiji biyayya, Hakika za a sa masa albarka kamar haka.

⁵ Ubangiji ya sa maka albarka daga Sihiyona! Ya sa ka ga Urushalima ta arzuta Dukan kwanakinka!

⁶ Ya kuma sa ka ka ga jikokinka! Salama ta kasance ga Isra'ila!